1. मूल ( प्रा. चंद्रकांत मनियार )

मूल येथील माऊंट कॉन्व्हेंट अँड जुनिअर कॉलेज ऑफ सायन्स येथील इयत्ता १० वीच्या विद्यार्थ्यांचा निरोप समारंभ अत्यंत उत्साहपूर्ण आणि भावनिक वातावरणात संपन्न झाला. संपूर्ण सभागृह आकर्षक फुलांच्या सजावटीने, रंगीबेरंगी फुग्यांनी व प्रकाशयोजनांनी नटले होते. विद्यार्थ्यांनी “Farewell 2026” अशा सुंदर फलकांनी मंच सजविला होता.
कार्यक्रमाची सुरुवात पारंपरिक पद्धतीने दीपप्रज्वलन व सरस्वती पूजनाने करण्यात आली.
या सोहळ्याच्या अध्यक्षस्थानी. भाऊराव झाडे (अध्यक्ष) विराजमान होते. प्रमुख पाहुणे म्हणून  मान.शोभा झाडे यांची  उपस्थिती कार्यक्रमाची शोभा वाढवणारी ठरली.
विशेष अतिथी म्हणून मा. सुहास झाडे  तसेच प्राचार्या रीमा कांबळे मॅडम (प्राचार्या) उपस्थित होत्या.

यावेळी मा. अस्पाक सय्यद  (उपप्राचार्य) आणि मा. दुष्यंत गणवीर  (ज्युनिअर कॉलेज प्रभारी) यांनी विद्यार्थ्यांना मार्गदर्शन करताना मेहनत, शिस्त व आत्मविश्वास यांच्या बळावर यश संपादन करण्याचे प्रेरणादायी विचार मांडले.
विद्यार्थ्यांनी आपल्या शालेय जीवनातील आठवणींना उजाळा देत मनोगते व्यक्त केली. काही विद्यार्थ्यांच्या भाषणांमुळे वातावरण भावनिक झाले. या प्रसंगी सांस्कृतिक कार्यक्रम — नृत्य, गाणी व विनोदी सादरीकरणांनी कार्यक्रमात रंगत आणली. शिक्षकांनी विद्यार्थ्यांना पुढील शैक्षणिक प्रवासासाठी आशीर्वाद व शुभेच्छा दिल्या.
समारोप प्रसंगी विद्यार्थ्यांना स्मृतिचिन्ह देऊन गौरविण्यात आले. आभार प्रदर्शनाने कार्यक्रमाची सांगता करण्यात आली.
भावनांनी ओथंबलेला हा निरोप समारंभ विद्यार्थ्यांच्या आयुष्यातील अविस्मरणीय क्षण ठरला. सर्व मान्यवरांनी विद्यार्थ्यांच्या उज्ज्वल भविष्यासाठी हार्दिक शुभेच्छा दिल्या.