मूल ( मेहुल मनियार )

मूल शहरातील गॅस धारकांना 45 दिवसाऐवजी 25 दिवसात गॅस सिलेंडर चा पुरवठा व्हावा, यासाठी वारंवार मागणी करून सुद्धा गॅस धारकांची ही मागणी अजून पावेतो पूर्ण झाली नाही. त्यामुळे गॅस एजन्सी प्रशासनाने ही मागणी लवकरात लवकर पूर्ण करावी, याबाबत माजी नगरसेवक व सामाजिक कार्यकर्ता मोतीलाल टहलियानी तसेच भाजयुमो चे उपाध्यक्ष सुरज मांदाडे यांनी मागणी केली आहे.

          मुल येथील गॅस एजन्सी काही कारणाने बंद झाली होती, त्यामुळे सावली येथील एजन्सी मार्फत मूल शहरात सिलेंडर पुरवठा केला जात होता.आता मात्र मूल शहरात एजन्सी सुरू झालेली आहे. एकंदरीत मूल शहर तालुक्याचे क्षेत्र असल्यामुळे गॅसधारकांना 25 दिवसात गॅस सिलेंडर मिळावयास पाहिजे. परंतु अजूनही 45 दिवसानंतर गॅस सिलेंडर मिळत आहे.या संदर्भात मोतीलाल टहलियानी यांनी या क्षेत्राचे आमदार सुधीर भाऊ मुनगंटीवार यांना पत्र दिले होते. त्या अनुषंगाने मुनगंटीवार यांनी राज्याचे मुख्यमंत्री यांना 6 मे रोजी आणि केंद्रीय पेट्रोलियम व प्राकृतिक गॅस मंत्री यांना 24 जून रोजी पत्र दिले आहे. तरी सुद्धा याबाबत वरिष्ठ स्तरावरून कुठलीही मागणी पूर्ण झालेली नाही.

        यामुळे गॅसधारकांना बऱ्याच अडचणी येत आहेत. म्हणूनच गॅसधारकांच्या अडचणी सोडविण्यासाठी या मागणीकडे तातडीने लक्ष द्यावे, असे म्हटले जाते.