मूल  ( प्रा. चंद्रकांत मनियार )

   मूल येथील नवभारत विद्यालय तथा कनिष्ठ विज्ञान महाविद्यालय मूल येथे 7 ऑगस्ट 2026 रोजी प्रजापिता ब्रह्माकुमारी ईश्वरी विश्वविद्यालयाच्या वतीने भारत सरकारच्या अनुमतीने राबविण्यात येणाऱ्या ‘दहा कोटी नशामुक्त प्रतिज्ञा महाअभियान’ अंतर्गत विद्यार्थ्यांना नशामुक्ती बद्दल मार्गदर्शन आणि शपथ देण्यात आली. हे अभियान दिनांक 6 ते 20 ऑगस्ट पर्यंत चालणार आहे.

कार्यक्रमाच्या अध्यक्षस्थानी शाळेचे मुख्याध्यापक तथा प्राचार्य  सी. जी. बारसागडे होते. प्रमुख उपस्थिती म्हणून पर्यवेक्षिका सौ. वर्षा भांडारकर व ज्येष्ठ शिक्षक श्री गुरुदास चौधरी उपस्थित होते.

यावेळी प्रमुख मार्गदर्शक दीपा दीदी व सुरेश रायकंटीवार यांनी विद्यार्थ्यांना नशेचे दुष्परिणाम, व्यसनमुक्त जीवनाचे महत्त्व आणि निरोगी समाजनिर्मितीसाठी युवकांची भूमिका याविषयी मार्गदर्शन केले. त्यानंतर विद्यार्थ्यांना नशामुक्त भारत घडविण्याची सामूहिक प्रतिज्ञा देण्यात आली.

या कार्यक्रमाच्या यशस्वी आयोजनासाठी आशिष गुलानी व इंदुताई पुप्पलवार यांनी विशेष सहकार्य केले. कार्यक्रमास शिक्षक, शिक्षकेतर कर्मचारी व मोठ्या संख्येने विद्यार्थी उपस्थित होते. उपस्थितांनी नशामुक्त समाज निर्माण करण्यासाठी स्वतः नशेपासून दूर राहण्याबरोबरच इतरांनाही जागृत करण्याचा संकल्प केला.